د کرنې، اوبولګولو او مالدارۍ وزارت او د افغانستان د کرنې او مالدارۍ خونې ګډ پلاوي اوزبیکستان ته د خپل سفر په ترڅ کې د دغه هېواد د سوداګرۍ او صنایعو خونې له مسولینو سره لیدنه کړې.
مولوي صدر اعظم عثماني اوزبیکستان ته د افغانستان د کرنیزو محصولاتو د صادراتو د زیاتوالي په اړه خبرې کړي او ویلي يي دي؛ افغانستان او اوزبیکستان دوه ګاونډي هېوادونه دي، چې ګډې ګټې لري او موږ هم غواړو چې اوزبیکستان ته د خپل هېواد د کرنیزو او مالدارۍ محصولاتو صادرات ډېر او په دې برخه کې شته ستونزو ته د پای ټکی کېږدو.
نوموړي زیاته کړې؛ چې د ښو اړیکو په ټینګولو سره له افغانستان څخه اوزبیکستان ته د کرنیز محصولات صادرات ډېر کړو، په همدې ډول له ګاونډيو هېوادونو سره د سوداګرۍ په برخه كې خپلو ښو اړيكو ته دوام وركوو.
د اوزبیکستان د سوداګرۍ وزارت مرستیال د افغانستان او اوزبیکستان ترمنځ د سوداګریزو اړیکو د پراختیا یادونه کړې او ویلي يي دي؛ موږ د افغانستان له حکومت سره ډېرې ښې اړیکې لرو او هڅه کوو، چې دا اړیکې نورې هم پراخې کړو.
نوموړي زیاته کړې؛ چې موږ د افغانستان لپاره پر یوه نوی سیستم کار کوو، چې په پلي کېدو سره به یې افغانستان ته ډېرې اسانتیاوې رامنځته شي، چې په نږدې راتلونکي کې به یې اعلان کړو.
د افغانستان د کرنې او مالدارۍ د خونې مشر خان محمد فروتن د سوداګرۍ د ارزښت په اړه خبرې کړي او له افغانستان څخه اوزبیکستان ته د کرنيزو او مالدارۍ محصولاتو د صادراتو د ستونزو د حل غوښتنه کړې، چې د یاد هېواد د سوداګرۍ او صنایعو خونې چارواکو له خوا د شته ستونزو د حل ډاډ ورکړل شوی.
د کرنې، اوبولګولو او مالدارۍ وزارت د مقام سلاکار محمد ولي وزیري په اوزبیکستان کې د صنعت د ودې یادونه کړې او د اوزبیکستان د سوداګرۍ او صنایعو خونې له مسولینو یې غوښتي، چې د اړتیا وړ خام مواد له افغانستان څخه وارد کړي، ځکه چې افغانستان د خامو موادو په تولید کې ښه پرمختګ کړی دی.