د ملي دفاع وزارت ستر درستیز د ځانګړو ځواکونو قوماندانۍ د عالي تعلیماتو له ښوونځي د دویمې دورې څخه ۸۹۷ ځوان عسکر د عقیدوي زدهکړو ترڅنګ د کمانډویي تعلیماتو له شپږ میاشتنيو بېلا بېلو مسلکي زدهکړو فارغ شول.
په یادو مراسمو کې د رییس الوزرا اداري مرستیال مولوي عبدالسلام حنفي، د ملي دفاع سرپرست وزیر مولوي محمد یعقوب مجاهد او د کابینې ګڼ شمېر وزیرانو مسولینو او مشرانو ګډون کړی وو.
د رییس الوزرا اداري مرستیال مولوي عبدالسلام حنفي پخپله وینا کې نوي کمانډویي ځواک ته د مبارکۍ ترڅنګ ویلي، چې تاسې د اسلامي نظام د حفاظت، د هیواد د ښیرازۍ او جوړولو، او د شهیدانو د ارمانونو د پوره کولو لپاره روزل شوي یاست.
دغهراز تاسې د راغلې ازادۍ ساتونکي یاست او په کلکه له خپلو مقدساتو څخه دفاع وکړئ.
د ملي دفاع سرپرست وزیر مولوي محمد یعقوب مجاهد پخپلو خبرو کې ویلي؛ تاسې چې کومې زده کړې ترسره کړې دا د یوه لوی هدف لپاره دي او هغه د اسلامي نظام او د افغانستان له خاوری څخه دفاع ده.
تاسې باید پخپل عزم کې مستحکم یاست او د خپلو نور نظامي ارګانونو له منسوبینو سره به اوږه په اوږه له خپلې خاورې څخه دفاع کوئ.
ښاغلي مجاهد زیاته کړې؛ ولس ته ډاډ ورکوم چې دا ځواکونه به ستاسې د سر او مال ساتنه کوي او ستاسې د سوکالۍ سبب به ګرځي، د خپلو دفاعي ځواکونو تر شاه ودریږئ، دغه ځواکونه به زموږ او ستاسو د اسلامي هیواد له سرحداتو څخه ساتنه او دفاع کوي او هیڅ یو اشغالګر ته به اجازه ورنه کړي چې زموږ په هېواد کې ګډوډي رامنځ ته کړي.
په پای کې یادو کمانډویي ځواکونو خپل عملي نمایشات او مانورونه د مسؤلینو په حضور کې په عالي نظم سره ترسره کړل او بری لیکونه ورکړل شول.
