د کابل ښاروال مولوي عبدالرشید په مشرۍ، د دغې ادارې د یو شمېر مسولینو په ګډون په ښار کې د اعلاناتي بلبورډونو او ګرځنده پلورونکو دفعالیت د ثبت او راجستر د نوې طرحې په اړه غونډه کړې.
په دې غونډه کې کابل ښاروال د ښاري نظم د ښه والي او د کابل ښاروالۍ د ښه مالي مدیریت په موخه، د عوایدو او معلوماتي ټکنالوژۍ ریاست له خوا د بلبورډونو او ګرځنده پلورونکو د ثبت او راجستر وړاندې شوې طرحه مثبته ارزولې او د لا بډاینې په اړه يې خپل نظرونه وړاندې کړي.
په پام کې ده چې، له ناحیو سره په همغږۍ کې به دګرځنده پلورونکو فعالیت،ځای، دفعالیت ډول او دفعالیت د ځای اندازه او دغه راز د ځانګړو فورمو دډکولو له لارې د اعلاناتي بلبوردونو ځای او اندازه جوتېږي.
وروسته د ښار په کچه د ټولو بلبوردونو او ګرځنده پلورونکو د ټولو فعالیتونو کره شمېره او په اړه یې معلومات په یوه معلوماتي بانک او دیتابیس کې راټول او د کابل ښاروالۍ د مالي مدیریت په سیسټم (IFMS) کې چې، یو منظم بریښنایي اداري سیستم دی ثبتیږي.
په دې سره به ښه ښاري نظم رامنځته، د کابل ښاروالۍ عواید به په شفاف ډول راټول او له بلې خوا به د ګرځنده پلورونکو فعالیتونه هم خوندي او منظم شي.
په پای کې کابل ښاروال مسولینو ته سپارښتنه کړې، چې دغه طرحه دې پلې شي، ځکه د برېښنايي سیستم کارول د کارونو د چټکتیا، روڼتیا او ښې حکومتوالۍ په رامنځته کولو کې ګټور او اغېزمن دي.