د کرنې، اوبولګولو او مالدارۍ سرپرست وزیر مولوي عطاالله عمري ختیځ ته د خپل سفر په ترڅ کې د ننګرهار په شیخ مصري صنعتي پارک کې د تل پسرلی د چرګانو د دانې او هګیو د تولید له شرکت څخه لیدنه کړې او د دغه شرکت د کارکوونکو او خبریالانو په شتون کې په هېواد کې د پانګونې په هکله خبرې کړي.
مولوي عطاالله عمري د خپلو خبرو په ترڅ کې پانګوالو او سوداګرو ته بلنه ورکړې، چې په هېواد کې د کار او پانګونې لپاره مناسب چاپېریال برابره شوې، را دې شي او په خپل هېواد کې پانګونه او کار وکړي.
ښاغلي عمري ویلي؛ اوس مهال موږ د امن، ارامۍ او سولې په فضا کې یو، د دې هېواد ځوانانو په خپلو زړورتیا او شهادتونو سره جهاد کړی او دې هېواد ته یې ازادي، خپلواکي او امنیت راوړ، اوس د پانګوالو او سوداګرو د جهاد وخت دی، چې پانګوال او سوداګر راشي او کار وکړي.
نوموړيي زیاته کړې؛ راشئ خپله پانګه په دې هېواد کې ولګوئ، ترڅو تاسو او ولس ترې ګټه پورته کړي، د کرنې وزارت چمتو دی، چې په ټولو برخو کې اسانتیاوې رامنځ ته او د پانګونې زمینه برابره کړي.
د تل پسرلی شرکت رییس د کرنې وزیر څخه مننه او قدرداني کړی، چې ننګرهار ته د سفر په ترڅ کې د دوی له شرکت څخه لیدنه کې او د ګمرکي تعرفې د کمولو او د چرګانو د دانې اومه موادو په برخه کې د اسانتیاوو راوستلو غوښتنه یې کړې، چې د کرنې سرپرست وزیر له خوا د هر اړخیزې همکارۍ ډاډ ورکړل شوی.