د اوبو او انرژي سرپرست وزیر ملا عبداللطیف منصور د ترکیې هېواد د انادولو علماوو له رییس شیخ عمر فاروق مدرس اوغلو، د تومسیاد سوداګریريزې موسسې له رییس فاتح شینیر او یو شمېر نورو ترکي پانګوالو سره لیدنه کړې.
په دغه لیدنه کې د ترکیې هېواد پانګوالو د بېلابېلو سرچینو څخه د برېښنا د تولید په پروژو کې د پانګونې لیوالتیا څرګنده کړې.
د اوبو او انرژي سرپرست وزیر په افغانستان کې د پانګونې په برخه کې د دوی د لیوالتیا ستایلې او ویلي يي دي؛ دغه هېواد د بېلابېلو سرچینو څخه د انرژي د تولید اړین ظرفیتونه لري او د وزارت رهبري هم په دې برخه کې د پانګوالو له لېوالتیا هر کلی کوي.
ښاغلي منصور ټینګار کړی، چې د دواړو لورو د مسولینو ترمنځ د لا زیاتي همغږۍ په موخه دې تخنیکي ناستې ترسره شي، ترڅو ډېر ژر د دې پانګونو لپاره زمینه چمتو او عملي چارې یې پیل شي.