کابل کې د قطر اسلامي دولت سفیر سعید بن مبارک الخیارين د مهاجرینو او راستنېدونکو چارو له سرپرست وزیر خلیل الرحمن حقاني سره لیدنه کړې.
د مهاجرینو چارو سرپرست وزیر د راستنېدونکو مهاجرینو په ستونزو او اړتیاو خبرې کړي.
نوموړي د افغانستان سره د قطر هېواد همېشنۍ همغږي او مرستې ستایلي او ویلي يي دي؛ د ژمي په رارسېدو سره د مهاجرینو ستونزې زیاتې شوي دي، د مهاجرینو چارو وزارت د خپل پلان له مخې هڅه کوي ددوی ستونزو ته رسېدنه وکړي او په دې برخه کې د بشرپاله هېوادونو مرستو ته هم اړتیا ده.
د قطر سفیر ویلي؛ له افغانانو سره اړیکې زه د ځان لپاره ویاړ ګڼم، قطر هېواد د زلزله ځپلو سره هم ٦٠ ټنه د خوراکي او غیر خوراکي توکو مرستې کړي او د مهاجرینو لپاره به هم خپلې هڅې ونه سپموي.
نوموړي زیاته کړې؛ څو ورځې مخکې په دوحه کې د اسلامي هېوادونو ناسته وه، چې په هغې کې د افغانستان په ملاتړ ټینګار وشو او د بشري مرستو په اړتیا هم خبرې وشوې.