د افغانستان اسلامي امارت د ریاست الوزرا اداري مرستیال مولوي عبدالسلام حنفي په مشرۍ او د کډوالو ستونزو ته د رسېدنې عالي کمېسیون غړو په ګډون د یاد کمېسیون غونډه جوړه شوې.
یاده غونډه کې لومړی د کډوالو ستونزو ته د رسېدنې عالي کمېسیون د کمېټو ریيسانو د خپلو کړنو او فعالیتونو راپور وړاندې کړي.
ورپسې د هغو کډوالو د ستونزو د حل په څرنګوالي، چې افغانستان ته په اجباري توګه راستانه شوي او د استوګنې ځای نه لري، د کندهار ولایت د دامان ولسوالۍ د قلعه غیبي ګچ خانه کوچیانو د ستونزو په حل او همدارنګه د راستنېدونکو کډوالو د ستونزو د کمولو په موخه له هغوی سره د همکارۍ په څرنګوالي او د کډوالو اړوند نورو مسایلو په اړه تفصیلي بحث شوی او لازم تصمیمونه نیول شوي.
په پای کې د بېلابېلو موضوعاتو د ارزونې په موخه کمېټې جوړې او ګومارل شوي، چې ورسپارل شوي موضوعات هراړخېز وڅېړي او د کمېسیون راتلونکې غونډې ته یې په اړه معلومات ورکړي.