د ایران له لوري په پاکستان له راکټي بریدونو وروسته، تازه پاکستاني ځواکونو ویلي، چې نن د پنجشنبې په سهار يې د ایران په سیستان او بلوچستان کې په درېیو بېلا بېلو سیمو راکټي بریدونه کړي.
د پاکستان بهرنیو چارو وزارت په نشر کړې اعلامیه کې ویلي؛ پنجشنبې پر سهار د ایران په سیستان بلوچستان سیمه کې د ترهګرو پر ځانګړو پټنځایونو اړوند پوځي بریدونه پیل کړي، چې د (مرګ بر سرمچار) نوم ورکړل شوی.
د ایران د سیستان بلوچستان والي امنیتي مرستیال علي رضا مرحمتي ویلي؛ د ایران په خاوره کې پر یوه کلي د پاکستان توغندیز برید له کبله درې ښځې او څلور ماشومان چې ټول بهرنیان دي، وژل شوي دي.
د ایران سپاهپاسدارانو د چهارشنبې په شپه پاکستان کې د ایران ضد ډلو مرکزونه په نښه کړي وو.
پاکستان د دې بریدونو په غبرګون کې له ایران څخه خپل سفیر بېرته رابللی او اسلام اباد ته یې د ایران د سفیر د راتلو مخالفت کړی.
پاکستان دغه راز له ایراني چارواکو سره ټولې رسمي لیدنې ځنډولې دي.