د لوړو زده کړو وزارت علمي مرستیال دوکتور لطف الله خیرخواه د کور او ښار جوړولو وزارت د ښاري چارو مرستیال شیخ مدار علي کریمي بامیاني او ورسره مل پلاوي سره د دوه اړخیز هوکړه لیک د عملي کولو پر څرنګوالي مفصلي خبرې کړي.
د یاد دوه اړخیز هوکړه لیک پر اساس، چې مخکې لاسلیک شوی، د لوړو زده کړو وزارت اړوند امارتي تحصیلي بنسټونو محصلین کولی شي، چې د کور او ښار جوړونې وزارت په پروژو کې عملي زده کړې وکړې او همدارنګه لوړو زده کړو وزارت به د خپلو پوهنتونونو په انجنیري پوهنځیو کې د کور او ښار جوړولو وزارت د کار کوونکو لپاره د ظرفیت لوړونې زمینه برابروي.
په دې ناسته کې د لوړو زده کړو او ښار جوړولو وزارت مرستیالانو خپلو اړوندو رییسانو ته دنده وسپارلې، چې د یاد هوکړه لیک د موادو د پلي کېدو په برخه کې لازم او چټک اقدامات وکړي.
د لوړو زده کړو وزارت د محصلینو د عملي زده کړو په خاطر له نورو ادارو او وزارتونو سره هم ورته هوکړې لاسلیک کړي دي.