د بادغیس ولایت مرکز قلعهنو ښار کې د الکترونیکي تذکرو د وېش دویمه څانګه د ولایت مقام د پلاوي، رييسانو، علماوو، قومي مشرانو او د دې ولایت د احصایې او معلوماتو د ریاست د ځینو کارکوونکو په شتون کې پرانېستل شوه.
په دې اړه جوړ شوی پروګرام کې د یاد ولایت د علماوو شورا رییس شیخ محمد معروف د الکترونیکي تذکرو د وېش د دویمې څانګې پرانېسته هېوادوالو ته د خدمت په برخه کې یو اغېزناک ګام یاد کړ او زیاته یې کړه چې ولسونو ته خدمت او خپله دنده پېژندل د اسلام په مقدس دین کې یو مهم اصل دی.
د بادغیس ولایت د احصایې او معلوماتو رییس ملا ضیاء الدین بختیار د بادغیس اوسېدونکو ته د دې څانګې د کار پيل مبارکي وویله او زیاته یې کړه، چې دا څانګه د لسو کارکونکو په درلودو سره، په ورځني ډول له ۱۰۰ تر ۱۵۰ پورې غوښتونکو د غوښتنلیکونو د طی مراحل کولو وړتیا لري.
همدارنګه ښاغلي بختیار زیاته کړه، د یاد ولایت د الکترونیکي تذکرو په لومړۍ څانګه کې هره ورځ د ۲۵۰ غوښتونکو اسناد طی مراحل او تذکرې یې د چاپ په موخه مرکز ته استول کېږي.
د بادغیس ځينې اوسېدونکي د دې څانګې په پرانېستل کېدو خوښي څرګندوي او هېوادوالو ته د اسانتیاوو برابرول د چارواکو مسولیت ګڼي.
د احصایې او معلوماتو ملي اداره ژمنه ده، چې د هېواد په کچه ټولو هېوادوالو ته پر وخت او متوازن خدمتونه وړاندې کړي، په همدې اساس یې د هېواد په کچه د الکترونیکي تذکرو د وېش لړۍ لرې پرتو سیمو او ولسوالیو ته غځولې ده، چې د یادو سیمو اوسېدونکي په اسانۍ سره کولای شي خپلې الکترونیکي تذکرې ترلاسه کړي.