غزه کې د حماس او اسرائیلو تر منځ څلور ورځنی اوربند جمعه سهار پیل شو.
د اوربند له پلي کېدو وروسته اسرائیلي الوتکې د غزې له فضا څخه وتلي، د غزې اوسېدونکي بېرته خپلو سیمو ته د ستنېدو په حال کې دي او د مرستو بار وړونکي او سون توکو موټر د رفح سرحدي دروازې له لارې غزې ته دننه شوې دي.
د حماس او اسرائیلو ترمنځ د هوکړې له مخې، څلور ورځنی بشري وقفه به په موقتي توګه پر غزې بریدونه ودروي او د بندیانو تبادله او بشري مرستې به پیل کړي.
د قطر د بهرنیو چارو د وزارت له خوا د اعلان شوي توافق له مخې، وروسته له دې چې اسرائیل او حماس په غزه کې نښتې ودروي، غزې ته د بشري مرستو لېږد به د رفاح سرحدي دروازې له لارې پیل شي.
همداراز غزه کې د څلور ورځني اوربند په لومړۍ ورځ د ۲۴ ښځو په ګډون ۳۹ فلسطینیان د صهیونیستي رژیم له زندانونو او ۱۳ اسرائیلي اسیران د حماس له خوا آزاد شول.
ورته مهال د حماس له خوا د یوې جلا هوکړې له مخې یو فلیپیني او ۱۰ تایلنډي زندانیان هم ازاد شول.