د فاریاب ولایت مسولین وايي؛ چې د یاد ولایت په مرکز میمنه کې د یو سوداګریز کمپلکس د جوړولو چارې پیل شوې.
مسولین زیاتوي؛ دغه سوداګریز کمپلکس به په ۶۲۵ متر مربع ساحه کې جوړ او د څلورو پوړوو درلودونکی به وي، چې ټول لګښت (۲۱ میلیونه افغانۍ) یې د میمنې ښاروالۍ د عوایدو څخه ورکول کیږي.
د میمنې ښاروال ملا ګل احمد مبشر ویلي؛ د ميمنې ښاروالۍ له عوايدو څخه د ٢١ ميليونه افغانيو په ارزښت د دغه سوداګريز کمپلکس د جوړولو چارې پيل شوې.
نوموړي زیاته کړې؛ د ميمنې ښار سوداګريز کمپلکس د دغه ښار په مندووي کې موقعيت لري او د سوداګرۍ د بهير د ښه والي او سوداګرو ته د اسانتيا په رامنځته کولو کې ګټور او اغېزمن تمامېدلى شي.
ښاغلي مبشر همداراز زیاته کړې، چې د ميمنې سوداګريز کمپلکس د جوړېدو چارې به په اتو مياشتو کې بشپړې شي.
سوداګر او ښاریان د یاد سوداګریز کمپلکس له جوړیدو خوښ دي او په وینا یې، دغه کمپلکس به د سوداګرۍ او اقتصاد په وده کې یې مهم رول ولوبوي.