وروسته ترهغې، چې د غزې په روانه جګړه کې د لنډ مهالي اوربند پر مهال د حماس غورځنګ او صهیونستي رژیم ترمنځ د زندانیانو تبادله ترسره شوه، یو شمېر ازاد شوي فلسطینيانو ویلي، اسرایلو ورسره په زندانونو کې بد چلند کړی او د دوی په زورونه کې یې ان له سپو استفاده کوله.
دوي زیاته کړې، اسرایلي پوځیانو یې لاسونه او پښې ورماتې کړي او په بد روغتیایي وضعیت کې یې د سره صلیب نړیوالې کمیټې ته سپارلي دي.
یادې کمیټې هم منلې، چې د تبادلې پر مهال د ځینو زندانیانو درملنه د دوی له لوري په امبولانسو او یا هم سیارو کلینکونو کې شوې ده.
د ځینو رسنیو د راپورنو له مخې؛ اسرایلي زندانونو کې دغه راز زندانیانو ته کافي او پر وخت خوراک نه دي ورکول شوي او په هر ډول حالاتو کې یې د ستونزو سره مخ کړي وو.
د سره صلیب نړیوالې کمیټې او هغو روغتونونو، چې د دغو زندانیانو د معایناتو مسولیت یې پر غاړه درلوده ویلي، چې د دغو زندانیانو اکثریت یې روغتونونو کې بستر کېدو ته اړتیا لري.