د ریاست الوزرا اداري مرستیال مولوي عبدالسلام حنفي د بادغیس ولایت د جوند ولسوالۍ یو شمېر علماوو او مجاهدینو سره لیدنه کړې.
علماوو بادغیس ولایت په ځانګړي ډول د جوند ولسوالۍ د ټولنیز، اقتصادي او محلي حکومتولۍ د وضعیت په اړه د ریاست الوزرا اداري معاونیت مقام ته معلومات ورکړي.
یادو علماوو د اشغالګرو پر وړاندې د مبارزې په وخت کې د بادغیس ولایت د علماوو او مجاهدینو د مبارزو او سرښندنو یادونه کړې او په هېواد کې په سراسري امنیت او د اسلامي امارت په بریا خوښي ښودلې.
علماوو او مشرانو د اسلامي امارت له رهبرۍ غوښتي، چې د مجاهدینو د ستونزو حل، د روغتیایي کلینیکونو، ښوونځيو او مدرسو جوړولو، د سرکونو ترمیم او همدارنګه په دې ولسوالۍ کې د مخابراتي شبکو فعالیت ته دې پاملرنه وکړي.
مولوي عبدالسلام حنفي ویلي، د اسلامي امارت مسولین تل په هېواد کې د امنیت د تامین او خلکو ته د هوساینې رامنځته کولو کوښښ کوي.
نوموړي زیاته کړې، د اسلامي امارت رهبري به شته امکاناتو ته په پام د جوند ولسوالۍ د خلکو د ستونزو د حل لپاره خپلې هڅې درېغ نه کړي.