د کډوالوو او راستنېدونکو چارو سرپرست وزیر خلیل الرحمن حقاني ننګرهار ولایت ته د خپل سفر په ترڅ کې ددغه ولایت د مختلفو قومونو او ولسونو له علماو او مشرانو سره لیدنه کړې.
د کډوالو چارو سرپرست وزیر ویلي؛ د ولس خدمت زمونږ دیني او شرعي وجیبه ده، د اسلامي نظام په ټینګښت سره د افغانانو سر، مال، خاوره او اسلامي او ملي ارزښتونه خوندي شوي دي او هیچاته به اجازه ورنکړو، چې دا ملت په قومي، سمتي او ژبني توپیرونو سره وویشي.
نوموړي زیاته کړې؛ مونږ د راستنېدونکو کډوالو لپاره د ژوند په هره برخه کې ددوی د لاسنیوي او دوی ته د ښه ژوند برابرولو پروګرامونه پکار اچولي.
ښاغلي حقاني د قومونو او ولسونو ترمنځ په یووالي ټینګار کړی او زیاته کړې یې ده؛ مونږ د هېواد د آزادۍ او اسلامي نظام د قیام لپاره په ګډه مبارزه کړې او اوس یې ساتنه هم زمونږ د ټولو ګډه وجیبه ده.
د ننګرهار ولایت قومي مشرانو د کډوالو په برخه کې د اسلامي امارت ښه مدریت او کړنې ستایلي او ډاډ یې ورکړی، چې په ورین تندي به د خپلو کډوالو ورونو کوربهتوب کوي او په هره برخه کې چې ددوی توان وي لاسنیوی به یې کوي.
ناسته کې یادو مشرانو خپلې ستونزې او مشکلات هم شریک کړي.
سرپرست وزیر ډاډ ورکړی، چې ستونزې به یې له اړوندو ارګانونو سره شریکې او د حل لپاره به یې هلې ځلې وکړي.