د سعودی عربستان ولیعهد او د قطر امیر له لوري په یوه ګډه خبرپاڼه کې د اسرایلو له لوري غزه کې د رامنځته شوې بشري ناورین د پای او مخنیوي غوښتنه کړې ده.
دواړو محمد بن سلمان او تمیم بن حمد ال ثاني ویلي، چې د نړیوالو فشارونو له لارې باید اسرایل دې ته اړ کړل شي، ترڅو د ملکي وګړو له په زوره بېځایه کولو څخه لاس واخلي.
دغه راز د ملګرو ملتونو ځانګړي راپور ورکوونکي هم په غزه کې د ملکیانو د قتل عام د سملاسي درولو غوښتنه کړې ده.
د حماس سیاسي ډلې یو ځل بیا په ټینګار سره ویلي، چې له اسرایلو سره هېڅ ډول خبرو ته نه کېني.
دغې ډلې له اسرایلي لوري سره خبرو ته کښېناستو یواځېنۍ لاره د یو دایمي اوربند ټینګېدل بللي دي.
د وروستیو راپورونو پر اساس اسرایلو د غزې په بېلابېلو برخو کې خپلو بریدونو ته زور ورکړی او هلته د ټولو وژل شویو فلسطینیانو او نورو شمېر ۱۶ زره ۲۴۲ تنو ته رسېدلی او دغه شمېر لا مخ پر ډېرېدو دی.