د چارو ادارې د پانګونې اسانتیا ریاست په مشرۍ د صنعت او سوداګرۍ، کانونو او پټرولیم، مالیې، کرنې اوبو لګولو او مالدارۍ، د پانګونې او سوداګرۍ اطاقونو د استازو په ګډون د صادراتي اسنادو د مرحلو طې کېدو لپاره د یو مرکز جوړېدو په موخه ناسته شوې.
د صنعت او سوداګرۍ وزارت د صادراتي چارو ریيس احسان الله فطرت ویلي؛ د دې مراکزو د جوړېدو موخه پانګوالو ته د اسانتیاوو برابرول، د سوداګریزو سندونو په طی مراحل کېدو کې چټکتیا، د اداري فساد، کاغذ پرانۍ مخنيوی او له خصوصي سکتور څخه ملاتړ دی.
ګډونوالو د یادې موضوع په اړه خپل نظرونه او وړاندیزونه شریک کړي او همداراز د صنعت او سوداګرۍ وزارت له لوري پريزنټیشن وړاندې شوی.
د چارو ادارې د پانګونې اسانتیا ریيس انجنیر احمد ضیاء خالد ویلي؛ اړوندې ادارې دې د یادې موضوع په اړه د هوکړه لیک پرځای د کار پر پریکړه لیک کار وکړي، هغه دې یوځای کړي او راتلونکې غونډې ته دې د وروستي کېدو په موخه وړاندې کړي.
همدارنګه غونډه کې پرېکړه شوې، ترڅو د کانونو او پټرولیم وزارت دې د یادې موضوع پرمخ وړلو لپاره خپل استازی دې کمېټې ته وروپیژني کړي.
باید وویل شي چې اوس د صادراتي اسنادو د طی مراحلو مرکزونه د کابل، کندهار او ننګرهار زونونو کې فعاله دي او د نورو زونونو د فعالېدو چارې په پام کې نیول شوې دي.