د ریاست الوزراء اداري مرستیال مولوي عبدالسلام حنفي د هېواد له یو تن ملي سوداګر ابراهیم حبیب یار سره لیدنه کړې.
ابراهیم حبیب یار په خپلو خبرو کې په هېواد کې د سرتاسري امنیت د ټینګښت او اقتصادي زمینو د پراختیا په اړه خوښي څرګنده کړې.
نوموړي ویلي؛ اسلامي امارت ټولو برخو په ځانګړي ډول د سوداګرۍ او پانګونې او همداراز سوداګرو او پانګوالو ته د لازمو اسانتیاوو د رامنځته کولو برخې ته ځانګړې پاملرنه لري او دا چاره د دې لامل ګرځېدلې، چې کورني او بهرني سوداګر او پانګوال په بشپړې لېوالتیا سره په هېواد کې پانګونه وکړي.
ښاغلي حبیب یار همداراز په هرات ښار کې د منل شویو معیارونو اړوند د یوه روغتون د جوړولو خبر ورکړی او ویلي يي دي، د اسلامي امارت د همکارۍ په صورت کې د هېواد په نورو ښارونو کې هم د روغتیا په برخه کې پانګونې ته چمتو دی.
مولوي عبدالسلام حنفي ویلي؛ اسلامي امارت افغان ولسونو ته د کارموندنې فرصتونو د رامنځته کولو په موخه د سترو پروژو د پلي کېدو او دغه راز سوداګرو او پانګوالو ته په هېواد کې د پانګونې او اقتصادي زمینو د پراختیا لپاره تل نه ستړې کېدونکی هلې ځلې کوي.
د ریاست الوزراء اداري مرستیال له ټولو پانګوالو څخه د هېواد په بېلابېلو برخو کې د دوی د پانګونې هرکلی کړی او ویلي يي دي، اسلامي امارت په دې برخه کې خپلې هیڅ راز هڅې نه درېغوي.