د افغانستان لپاره د ملګرو ملتونو بشري او پرمختیايي چارو مشر او یوناما مرستیال اندریکا رتواتي د کورنیو چارو له سرپرست وزیر خلیفه سراج الدین حقاني سره لیدنه کړې.

په پیل کې د کورنیو چارو سرپرست وزیر اندریکا ته د نوې دندې مبارکۍ ترڅنګ د یوناما پخواني مرستیال ډانیل انډریس څخه د چارو ښه مدیریت په پار مننه کړې او په راتلونکو چارو کې یې نوموړي ته د بریالیتوب هیله کړې.

 اندریکا شته امن د ډاډ وړ بللی او ژمنه یې کړې، چې د بشري مرستو په برخه کې به د خپل ماموریت د ښه ترسره کولو کوشش کوي.

همدا راز، هېواد ته له راستنیدونکو کډوالو سره د مرستو پر څرنګوالي او په هوسا ډول ځای پر ځای کېدلو هم خبرې شوي.

خلیفه سراج الدین حقاني د کډوالو په چارو کې د اندریکا اوږدمهاله ماموریت او تجربې ته په اشارې سره هیله څرګنده کړې، چې د ملګرو ملتونو له لوري به په کار کې لا ښه والی راشي.

د رياست الوزرا اداري مرستيال مولوي عبدالسلام حنفي نن ماسپښين د بېلابېلو ولایتونو يو شمېر علماوو او متنفذينو سره لیدنه کړې.

علماوو او متنفذينو د خپلو ولايتونو د ټولنيز، اقتصادي او امنيتي وضعيت په اړه ویلي؛ د اسلامي امارت مسولين شپه او ورځ خلکو ته د خدمتونو وړاندې کولو لپاره هڅه کوي او د دغو ولايتونو خلک د اسلامي امارت مسولینو او په ځانګړي ډول مجاهدينو څخه د امنيت تأمين له امله راضي دي.

نوموړو ښوونه او روزنه، روغتيا او انکشافي چارې د خلکو اصلي اړتياوې بللي او د اسلامي امارت مسولينو څخه يې د ځانګړې پاملرنې غوښتنه کړې.

مولوي عبدالسلام حنفي هغوی ته د ښه راغلاست ترڅنګ ویلي، اسلامي امارت په مختلفو برخو کې خلکو ته خدمت له خپلو اساسي ژمنو څخه بولي او په دې برخه کې به له هېڅ ډول هڅو درېغ ونه کړي.

د رياست الوزرا اداري مرستيال ښوونې او روزنې، روغتيا او انکشافي چارو ته په اشارې ویلي؛ د اسلامي امارت مسولين هڅه کوي د امکان تر کچې د خلکو اړتياوې پوره شي.

د ریاست الوزرا سیاسي مرستیال د ارګ د احسن العلوم مدرسې د حدیث شریف دورې د ۳۰ فارغانو دستاربندۍ مراسمو کې ګډون او وینا کړې.

په دغو مراسمو کې د ریاست الوزرا دفتر عمومي رییس ډاکتر ملا عبدالواسع، د ریاست الوزرا سیاسي مرستیال مولوي عبدالکبیر، د اسلامي امارت یو شمېر مسولینو او د یادې مدرسې استادانو هم شتون درلود.

غونډه کې د ریاست الوزرا سیاسي مرستیال ویلي؛ علم تر ایمان وروسته مهم نعمت دی او موږ د علم او وحدت په برکت نن د یو مسلمان امیر تر قیادت لاندې د اسلامي نظام څښتن یوو.

 نوموړي زیاته کړې؛ د اسلامي امارت بهرنۍ پالیسي په بریالۍ توګه د پلي کېدو په حال کې ده، له ګاونډیو، سیمې هېوادونو او نړۍ سره حسنه اړیکي لرو او په ۱۷ هېوادونو کې زموږ سیاسي نماینده ګۍ خلاصې دي.

مولوي عبدالکبیر ویلي؛ که نړۍ په الفاظو نه وایي، خو عملاً دوی اسلامي امارت په رسمیت پېژندلی دی او د سفارتونو او سوداګرۍ لپاره د بندرونو او لارو پرانیستل او له اسلامي امارت سره د تعلقاتو دوام په همدې معنی دی.

د ریاست الوزرا سیاسي مرستیال د هېواد اقتصادي وضعیت ته په اشارې زیاته کړې؛ د وچکالۍ سربیره افغانستان د غلو او دانو په تولید کې ځان بسیاینې ته نږدی شوی او تېر کال افغانستان پینځه میلیون میټریک ټنه غنم تولید کړي، چې د قوش تېپې کانال د چارو په بشپړېدو سره به د دې برخې کمی هم پوره شي.

نوموړي ویلي؛ د افغانستان په هره ولسوالۍ کې د یو چک ډیم جوړول پلان شوي او په اساسي ډول د سالنګ د پاتې ۸۰ کیلومټره لویې لارې په جوړېدو سربېره د افغانستان د لویو لارو جوړول لومړیتوب دی او دغه ټول کارونه اسلامي امارت پخپلو کورنیو امکاناتو ترسره کوي.

مولوي عبدالکبیر له نړۍ سره په اقتصادي او سیاسي برخو کې د افغانستان د سیال ګرځولو لپاره عملي اقداماتو ته په اشارې زیاته کړې؛ اسلامي امارت د هرې برخې لپاره ځانګړي پلانونه لري او د افغاني کرنسۍ د ثبات په څېر به ملت په نږدې راتلونکې کې د ټولو اقداماتو مثبتې پایلې وګوري.

د حج او اوقافو وزارت د جوماتونو رییس مولوي محمد نبي محمدي او مفتي احمد ذاکري د علم اهمیت په اړه ویلي؛ د فضیلت دستار تړل یو بل لوی مسولیت دی، چې نن یادو فاضلانو ته ور له غاړې کېږي.

نوموړو زیاته کړې، تاسو د پیغمبر ^(ص) وارثان یاست او دغه مقام ته د مجاهدینو د وینو په برکت رسېدلي یاست.

ډاکتر ملا عبدالواسع یادو فارغانو ته ویلي؛  تاسو باید له کتاب، قلم او علم سره دوامداره اړیکي ولرئ او د اشغال پای ته رسېدو او د اسلامي نظام له ټینګښت وروسته باید اوس دغه مسولیت په امانتدارۍ او دیانت ترسره کړئ.

نوموړي د احسن العلوم مدرسې د حدیث شریف دورې فارغانو ته د امیرالمؤمنین حفظه الله له لوري د ځانګړي چاپ شوي پیغام یادونه هم کړې، چې وروسته ټولو فارغانو ته وېشل شوی.

 همداراز د ارګ د احسن العلوم مدرسې د استادانو په استازیتوب مولوي اغا محمد فیضان ټولو فارغانو او د هغوی کورنیو ته د مبارکۍ ترڅنګ د دستاربندۍ په دغو مراسمو کې له ټولو ګډونوالو څخه مننه او هغوی ته د خیر دعا کړې.

غونډه د مولوي عبدالکبیر، د ریاست الوزرا دفتر عمومي رییس او د احسن العلوم مدرسې د استادانو له لوري فارغانو ته د فضیلت دستار په تړلو پایته رسېدلې.

د لوړو زده کړو سرپرست وزیر بغلان ته د رسمي سفر په ترڅ کې د ياد ولايت د جامعه دارالعلوم حقانيه مدرسې د فاضلانو د دستاربندۍ په مراسمو کې ګډون کړی.

د لوړو زده کړو سرپرست وزیر مولوي ندا محمد ندیم  په یادو مراسمو کې د طلبای کرامو او حافظانو په فراغت خوښي ښودلې او د ۲۰ کلن دور پر مهال يې د بغلان د غيور او مجاهد اولس د مبارزې او قربانۍ ستاينه کړې. 

نوموړي علماوو ته په خطاب کې ویلي؛ اوس مهال تاسو ته په افغانستان کې د حق ویلو تر ټولو ښه زمینه برابره ده.

 ښاغلي ندیم زیاته کړې؛ تاسو ته د اسلامي امارت امیر د حق په ویلو امر کوي، په داسې حال کې چې ډېری هېوادونو کې علماوو ته د حق ویلو اجازه نه ورکول کېږي.

همداراز د دیني علومو پر ارزښت یې ویلي؛ خلکو ته د خدمتونو وړاندې کولو لپاره پوهه او علم اړین دی، ترڅو د هغه په رڼا کې خپلې کړنې ترسره کړي.

د ټولګټو وزارت سرپرست وزیر ملا محمد عیسی ثاني ننګرهار ته د خپل کاري سفر په ترڅ کې، چې د دغه وزارت یو شمېر مرکزي رییسانو او د ننګرهار د ټولګټو رییس يې ملتیا کوله د جلال آباد – تورخم لويې لارې له دويم لین څخه له نږدې لیدنه وکړه.

 د جلال اباد – تورخم لویه لاره چې ۷۵ کیلو متره اوږد والی لري، رغنیزې چارې يې د ګاونډي هېواد پاکستان لخوا پرمخ وړل کېدلې خو چارې يې بشپړې شوي نه وې.

د ټولګټو وزارت سرپرست وزیر په دي اړه ویلي؛ که چېرته د ياد سړک کار د پاکستان هېواد لخوا بیا پيل نشي، ټولګټو وزارت به یې په راتلونکې کال کې د ترميم او غونې کار بشپړ کړي.

 سرپرست وزیر د جلال آباد – تورخم لویې لارې پر مسیر د دوو پایې پلونو د لعل پورې او فرضي کرښې ته نږدې له یو بل پل څخه د لیدنې ترڅنګ په دغه ولایت کې د جلال آباد ښار اړوند د نهمې حوزې او د تورخم بندر ته څيرمه دوه پايو تلو څخه هم لیدنه وکړې او اړوند مسولينو ته يې لارښوونې کړي، چې د يادو پُلونو د تخریب شويو پايو د بیارغونې چارې دې په چټکۍ سره تر سره کړي تر څو د دغو پلونو د لا تخریب مخه ونیول شي.

دغه راز د ننګرهار ولایت مقام ودانۍ په جوړه شوې ناسته کې د اسلامي امارت د ریاست الوزا اقتصادی مرستیال ملا عبدالغني برادر آخوند، د ټولګټو وزارت سرپرست وزیر ملا محمد عیسی ثاني، قومي مخورو، یو شمېر سیمه ییزو مسولینو او ملي پانګوالو پکې ګډون کړی و.

ملا محمد عیسی ثاني د کابل – جلال آباد لویې لارې د دويم لین سړک د رغولو په اړه ویلي؛ ما د کابل – جلال آباد د دويم لین څخه له نږدې لیدنه کړې ده او تخنيکي ټيمونه مو هم د ياد مسیر څخه د لیدنې په موخه ساحې ته لېږدولي.

ټولګټو وزارت د رياست الوزرا اقتصادي مرستيال الحاج ملا عبدالغني برادر اخوند سره په ګډه همکارۍ بشپړ چمتووالی لري، چې د افغانستان اسلامي امارت له زعیم امیرالمؤمنین حفظه الله سره موضوع شریکه او د مالي لګښت په تمویلیدو سره به يې د رغونې کار پيل کړي.

د ریاست الوزرا سیاسي مرستیال مولوي عبدالکبیر په کابل کې د ترکیې سفیر جنک اونال سره لیدنه کړې.

د ترکیې سفیر د افغانستان او ترکیې د اړیکو په پراختیا ټینګاری او ویلي يي دي؛ ترکي سوداګر چمتو دي، چې د کانونو، برېښنا او کرنې په برخو کې په افغانستان کې پانګونه وکړي.

نوموړي زیاته کړې، ترکیه له افغانستان سره د پوهنې او لوړو زده کړو په برخه کې همکارۍ ته چمتو ده او د افغانستان د پرمختګ ملاتړ کوي.

 د ترکیې سفیر ویلي؛ هېواد یې هیچاته اجازه نه ورکوي، چې د اسلامي امارت خلاف په ترکیه کې سیاسي او پوځي تحرکات وکړي.

د ریاست الوزرا سیاسي مرستیال له افغانستان سره د ترکیې له مرستو او همکاریو څخه مننه کړې او ویلي يي دي؛ د اسلامي امارت تر حاکميت وروسته په افغانستان کې ترکي پانګه والو ته د پانګونې ښه زمینه برابره شوې ده.

 مولوي عبدالکبیر زیاته کړې؛ اسلامي امارت له ټولو هېوادونو سره ښې اړیکي غواړي او هڅه کوي په سیمه کې اقتصادي او ترانزیټي اړیکي پراخې کړي.

 نوموړي د ترکیې له دې دريځ څخه، چې چاته د اسلامي امارت خلاف د پوځي او سیاسي تحرکاتو اجازه نه ورکوي مننه کړې او ویلي يي دي، اوس په هېواد کې ټولو افغانانو ته د ګډ او ارامه ژوند زمینه برابره شوې ده.

د مالیې وزارت اړوند د کابل مرکزي سېلو دولتي شرکت د خپلو فعالیتونو او تولیداتو د لا پراختیا په موخه له یو شمېر دولتي او خصوصي ادارو سره قراردادونه لاسلیک کړي دي.

د کابل مرکزي سېلو دولتي شرکت، چي د اسلامي امارت له بیا حاکمېدو وروسته له بشپړ فلج حالت څخه فعال حالت ته راوګرځېد او په فعالیت یې پیل وکړ؛ د روان (۱۴۰۲) مالي کال له پیل راهیسي یې د خپلو فعالیتونو او تولیداتو د لا پراختیا په موخه د ۴۴ میلیونه او ۵۹۵ زره افغانیو په ارزښت د ۱۴ بېلابېلو دولتي او خصوصي ادارو سره قراردادونه لاسلیک کړي دي، چي ورسره د یاد شرکت په عوایدو کي هم زیاتوالی راغلی.

مرکزي سېلو اوسمهال په اول او دوهم نمبر فابریکو کې ۱۴ پایې د ډوډۍ پخولو فعال داشونه لري، همدا راز یوه پایه داش د هرات او یو هم د کندهار په سېلو کې فعال دي.

د کابل مرکزي سېلو دولتي شرکت اوسمهال په ورځني ډول د یو ټن په اندازه په بېلابېل ډول وچه ډوډۍ، کیک، کلچې او ناشتې تولیدوي او په ۲۴ ساعتونو کې د ۴۵ ټنو اوړو د تولید ظرفیت لري.

د یادوني وړ ده، چې په یاده سېلو کې ۲۰۰ کسانو ته په مستقیم ډول د کار کولو زمینه هم برابره شوې ده.