دغه پروژه د اوبو او انرژي سرپرست وزیر ملا عبداللطیف منصور، د لوګر والي مولوي ضیاالرحمن مدني، د افغانستان د اسلامي امارت د لوړ پوړو مسؤلینو او د لوګر ولایت د مشرانو په شتون کې پرانیستل شوه.
د اوبو او انرژي سرپرست وزیر الحاج ملا عبداللطیف منصور د دغې پروژې د پرانیستې پرمهال ویلي؛ اوس د هېواد د اقتصادي پرمختګ او پراختیا وخت را رسېدلی او د اوبو او انرژي وزارت رهبري په دې برخه کې د افغانستان خلکو ته ډاډ ورکوي، یاد وزارت په رښتینې توګه هڅه کوي، چې خپل مسولیت په ښه توګه ترسره کړي.
د لوګر والي شیخ ضیاالرحمن مدني ویلي؛ د اسلامي امارت مسولین د افغانستان خلکو ته د رښتینو خدمتونو وړاندې کولو ته ژمن دي او په دې برخه کې به شپه او ورځ هڅې وکړي.
د خروار بند د جوړولو چارې د لومړي ځل لپاره د داودخان د حکومت پر وخت پيل شوې وې، خو له بده مرغه د ځينې ستونزو له کبله یې چارې نیمګړې پاتې شوې.
اوس له نېکه مرغه د اوبو او انرژي وزارت د رهبري مقام د هڅو او د افغانستان د اسلامي امارت په ملاتړ د دغه بند د بیارغونې او جوړولو چارې بیا پيل شوې.
د خروار بند د ۳۶ متره په لوړوالي او د ۱۴۰ متره په اوږدوالي د ۱۷ میلیون متر مکعب اوبو د ذخیره کولو وړتیا لري او تر بشپړېدو وروسته به کابو شپږ زره هکتاره کرنیزه ځمکه خړوبه کړي چې نږدې ۱۳ زره کورنۍ به ورڅخه استفاده وکړي.
لوګر کې د خروار بند جوړولو چارې پیل شوې
