د ریاست الوزرا اداري مرستیال مولوي عبدالسلام حنفي له یو شمېر اهل تشیع علماوو سره لیدنه کړې.
یاده لیدنې کې، د اهل تشیع علماوو د اسلامي امارت له لوري په هېواد کې د سراسري امنیت په ټینګښت او کاري پرمختګونو خوښي ښودلې.
یادو اهل تشیع علماوو ویلي، د تېرو کلونو د جنګونو پر مهال هېواد سخت ویجاړ شو او افغان ملت زیات زیانونه ولیدل اوس د اسلامي امارت تر واکمنۍ لاندې په هېواد کې د نظام د تثبیت او تحکیم، خلکو ته د خدماتو وړاندې کولو او د هېواد د ابادۍ پړاو رارسېدلی او اړینه ده، چې ټول یو بل ته لاسونه ورکړو او خپل یووالی وساتو.
د ریاست الوزرا اداري مرستیال په دې لیدنه د خوښي څرګندولو ترڅنګ د عامه اذهانو د روښانولو او د افغانانو ترمنځ د اتحاد او اتفاق په ټینګولو کې د علماوو او مشرانو د هڅو قدرداني کړې.
مولوي عبدالسلام حنفي ویلي، افغانستان د ټولو افغانانو شریک کور دی، په ابادي او پرمختګ کې یې باید یوځای کوښښ وکړو.
نوموړي د هېواد له علماوو غوښتي، چې د حقایقو د رسولو او د خلکو د پوهاوي کچې لوړولو په خاطر هڅې وکړي.