د ملي دفاع وزارت وایي، تېره ورځ (چهارشنبه، د لړم په ۳۰مه نېټه) د ریاست الوزرا سياسي مرستیال مولوي عبدالکبیر غزني ولایت ته د خپل سفر په ترڅ کې د ۲۰۳ منصوري قول اردو د درېیمې پلې محمدي لوا څخه لیدنه وکړه.
یاد وزارت زیاته کړې؛ د ریاست الوزرا سیاسي مرستیال مولوي عبدالکبیر یادې لوا ته د خپل راتګ پرمهال، چې د غزني ولایت والي حافظ امین جان عمري او ګڼو سيمه اييزو مسولينو یي ملتیا کوله د يادې لوا منسوبینو او مجاهدینو ته هر اړخیزه وینا کړې او د دوی قربانۍ یې ستایلی دي.
د رياست الوزرا سياسي مرستیال د خپلې وینا پر مهال مجاهدینو ته ویلي؛ د الله تعالی ستر احسان دی چې په دې پاکه خاوره د زیاتو قربانیو په ورکړې شرعي نظام حاکم او هغه ظلمونه، چې د ۲۰ کلن اشغال پر مهال ترسره کېدل له منځه تللي او په ټول هېواد کې امن دی.
مولوي عبدالکبیر د یادې لوا مجاهدینو ته په خطاب کې ویلي، نیتونه مو اصلاح کړئ او خپل بنسټیزې موخې مو د الله تعالی رضايت، شرعي نظام استحکام او خدمت وګرځوئ.