د کرنې، اوبولګولو او مالدارۍ وزیر مولوي عطاءالله عمري د خپل سفر په ترڅ کې د کندهار ولایت له والي او د دې ولایت له یو شمېر چارواکو سره لیدنه او خبرې کړې دي.
د مولوي عطاءالله عمري د سفر موخه د هغو ځمکو د وېش موضوع څېړل وو، چې د فتحې څخه مخکې د هغه وخت مشرتابه لخوا وېشل شوې وې، خو په دې برخه کې د ځمکو د تثبیت لپاره ځینې ستونزې او ننګونې موجودې وې.
مولوي عطاءالله عمري په دې لیدنه کې وضاحت ورکړی، چې ځینې ځمکې د اسنادو د نشتوالي او د ثبت ستونزو له امله په سمه توګه نه وې وېشل شوې.
نوموړي زیاته کړې، چې ورته ستونزې په هلمند ولایت کې هم موجودې وې او هلته هم د ځایي چارواکو لخوا د دې موضوع د حل لپاره غونډې ترسره شوې دي.
مولوي عطاءالله عمري له ځایي چارواکو غوښتي، چې د دې ستونزو د حل په برخه کې اړینه همکاري وکړي او په کندهار ولایت کې د کرنیزو ځمکو د دقیق تثبیت لپاره جدي هڅې وکړې.
په ورته وخت کې، د کندهار والي د دې موضوع د ملاتړ اعلان کړی او ویلي يي دي، چې د ټاکل شوې ډلې سره به اړینه همکاري وکړي.
د نیول شویو پرېکړو پر بنسټ د کندهار ولایت د کرنې ریاست تر څار لاندې به یوه تخنیکي ډله جوړه شي، چې د ولسوالیو په کچه د ځمکو د تثبیت او وېش موضوع وڅېړي او حل کړي.