د افغانستان ساحلي فوټبال ملي لوبډلې، چې اوس مهال د ۲۰۲۵ اسیا جام سیالیو ته د چمتووالي لپاره په تمریناتو بوخته ده، تېره ورځ (جمعه) له سعودي عربستان سره یې په دوستانه سیالۍ کې دغه هېواد ته د ۳ – ۲ ګولونو په توپیر ماتې ورکړه.
په دغه سیالۍ کې اکبر بهادري، فهیم حیدري او سعید سیاسي د افغانستان په ګټه ګولونه ووهل.
د دغو سیالیو پر دوام به د هېواد ساحلي فوټبال ملي لوبډله نن (شنبه، د کب ۲۵مه) په خپله دویمه دوستانه لوبه کې له جاپان سره مخامخ کیږي.
دغه سیالۍ د افغانستان پر وخت ماسپښین ۳:۳۰ بجې په ټایلینډ کې پیلیږي.
د ۲۰۲۵ اسیا جام سیالۍ به د روان میلادي کال مارچ میاشتې پر ۲۰مه نېټه پیل شي، چې افغان ملي لوبډله به په C ګروپ کې د ایران، متحده عربي اماراتو او اندونیزیا هېوادونو له لوبډلو سره سیالي وکړي.