د کورنیو چارو وزارت د دفتر رییس لوی پاسوال مولوي زینالله عابر په مشرۍ د ترافیکي پېښو د مخنیوي په موخه بېړنۍ غونډه وشوه.
په دې غونډه کې د وزارت د امنیتي چارو د ستر معنیت مرستیال، د کابل امنیه قومندان، د ترافیکو لوی رییس او نورو چارواکو ګډون کړی و.
دا غونډه د کابل-کندهار پر لویه لاره د وروستیو ترافیکي پېښو د مخنیوي او شننې په موخه جوړه شوې وه، چې له امله یې ګڼو هېوادوالو ته مرګژوبله اوښتې ده.
د غونډې ګډونوالو د ترافیکي پېښو د مخنیوي او عامه خونديتوب د ښهوالي لپاره اړینې لارښوونې او سپارښتنې کړې دي.
په ناسته کې د ترافیکي پېښو د مخنیوي پر عملي لارو چارو بحث شوی او د ترافیک پولیسو او عامه امن پولیسو تر منځ پر دوامداره همغږۍ ټینګار شوی دی.
همداراز پرېکړه شوې، چې د امنیتي چارو د ستر معینیت په همغږۍ دې له ترافیکي قوانینو سرغړوونکي موټر ودرول شي او د کابل د امنیې قومندانۍ پولیس دې د سرغړوونکو د نیولو په برخه کې عملي ګامونه پورته کړي.