هیأت وزارت صحت عامه به اوزبیکستان سفر کرد

هیأت تخنیکی به ریاست مولوی عبدالبصیر قانع، رییس عمومی تنظیم ادویه و محصولات صحی معینیت غذا و ادویه وزارت صحت عامه، به اوزبیکستان سفر کرده است.

وزارت صحت عامه می‌گوید، هدف این سفر، بازدید از کارخانه‌های تولیدی ادویه و محصولات صحی اوزبیکستان، ارزیابی ظرفیت‌های تولیدی، آشنایی با معیارها و سیستم‌های کنترول کیفیت و بررسی راه‌های تسهیل واردات ادویه معیاری به افغانستان است.

قرار است این هیأت با مسوولان شرکت‌های تولیدی اوزبیکستان پیرامون گسترش همکاری‌های تخنیکی، ارتقای معیارهای وارداتی و تأمین ادویه معیاری گفت‌وگو کند.