له پېښو سره د مبارزې او چمتووالي ادارې لوی رییس ملا نورالدین ترابي د افغانستان لپاره د اوزبیکستان له سفیر آیبک عثمانوف او د یاد هېواد د سفارت له اقتصادي او سیاسي مرستیال بهادر سره لیدنه کړې ده.
په دې لیدنه کې د بشري مرستو، د طبیعي پېښو د مدیریت او د دواړو هېوادونو ترمنځ د همکاریو د پراختیا په اړه خبرې شوې دي.
ملا نورالدین ترابي د اوزبیکستان له بشري مرستو مننه کړې او ویلي یې دي، چې د اقلیمي بدلونونو له امله په افغانستان کې د طبیعي پېښو کچه لوړه شوې او د خلکو اړتیاوې هم زیاتې شوې دي.
نوموړي زیاته کړې، چې له پېښو سره د مبارزې آمادګۍ اداره د زیانمنو شویو کسانو لپاره د مرستو د تنظیم، ترلاسه کولو او وېش مسوولیت لري او ټولې مرستې په شفاف او منظم ډول مستحقینو ته رسېږي.
بلخوا، د اوزبیکستان سفیر آیبک عثمانوف ویلي، چې هېواد یې د سختو شرایطو او طبیعي پېښو پر مهال د افغانستان له خلکو سره خپلو بشري همکاریو ته دوام ورکوي.
نوموړي ټینګار کړی، چې اوزبیکستان چمتو دی د طبیعي پېښو پر مهال له افغانستان سره خپلې مرستې او همکارۍ لا پراخې کړي.
د لیدنې په پای کې دواړو لوریو د دوستانه اړیکو او ګډو همکاریو پر دوام او پراختیا ټینګار کړی دی.