د امریکا د کوینیپیاک پوهنتون (Quinnipiac University) د یوې نوې نظرپوښتنې پایلې ښيي، چې له هرو لسو امریکايي رایهورکوونکو څخه شپږ د امریکا له لوري اسرائیلو ته د لا ډېرو پوځي مرستو له لېږلو سره مخالف دي.
د یادې نظر پوښتنې پایلې، چې پرون (چهارشنبه، د وږي ۵مه) خپرې شوې، څرګندوي چې ۶۰ سلنه رایه ورکوونکو اسرائیلو ته د امریکا د پوځي مرستو مخالفت کړی دی.
همدارنګه د نظر پوښتنې پایلې ښيي، چې ۵۰ سلنه امریکايي رایه ورکوونکي باور لري، چې اسرائیل په غزه کې نسلوژنه کوي.
د دې نظرپوښتنې د پایلو له مخې، اسرائیلو ته د امریکا له لوري د پوځي مرستو د لېږلو ملاتړ تر ټولو ټیټې کچې ته رسېدلی دی.
له دې وړاندې د امریکا د کانګرس دیموکرات استازي رو خانا هم د اسرائیلو د پوځي ملاتړ له امله پر امریکا سخته نیوکه کړې وه او ویلي یې وو، د غزې جګړه هغه وخت پای ته رسېږي، چې واشنګټن اسرائیلو ته د وسلو لېږد ودروي.