د افغانستان او زېمبابوې ترمنځ د درېیو شل اوریزو سیالیو لومړۍ لوبه کې افغان لوبډلې د ۵۳ منډو په توپیر خپلې سیالې لوبډلې ته ماتې ورکړه او د دې لړۍ لومړۍ بریا یې په خپل نوم کړه.
د لوبې پچه افغان لوبډلمشر راشد خان وګټله او د توپوهنې پرېکړه یې وکړه.
افغان لوبډلې په ټاګل شویو ۲۰ اورونو کې، د ابراهیم ځدران ۵۲، رحمن الله ګربز ۳۹، عضمت الله عمرزي۲۷، صدیق الله اتل ۲۵ او شاهدالله کمال د ۲۲ منډو پر مټ سیالې لوبډلې ته د ۱۸۱ منډو هدف وټاکه.
په دې پاڼۍ کې زېمبابوې لپاره سکندر رضا درې ، بلېسېنګ مزرباني دوه او براډ ایوانز یو افغان لوبغاړی وسوځول.
پر وړاندې یې زېمبابوې د ټاکل شوي هدف په تعقیب د ټولو لوبغاړو په زیان ۱۲۷ منډې وکړې او د ۵۳ منډو په توپیر یې لوبه وبایلله.
بلخوا بیا د افغان لوبډلې لپاره د توپ اچونې په برخه کې مجیب الرحمن ځدراڼ څلور، عظمت الله عمرزي درې او عبدالله احمدزي دوه لوبغاړي وسوځول.
عظمت الله عمرزی په ۲۷ منډو او درېیو ویکټو د دې لوبې غوره لوبغاړی ونومول شو.
د یادونې وړ ده، چې افغان لوبډله به خپله دویمه سیالي د اکتوبر میاشتې پر ۳۱مه نېټه ترسره کړي.