د ملي دفاع وزارت وایي، چې د دې وزارت اړوند د سیمهییزو قول اردوګانو (۱۴۷) تنه ځوان منسوبین د عبدالله بن مسعود رضياللهعنه د جګړهایزو ګډو زدهکړو قوماندانۍ د جګړهایزو ځواکونو ښوونځي د سرحدي پیاده کورسونو له درېمیاشتنیو مسلکي زدهکړو وروسته، د یو لړ مراسمو په ترڅ کې فارغ شول.
په دې مراسمو کې د عبدالله بن مسعود رضياللهعنه د جګړهایزو ګډو زدهکړو قومندانۍ د زدهکړو مرستیال مولوي محمود “قانع”، د جګړهایزو ځواګونو د ښوونځي قومندان حافظ صدام حسین “احمد ضیاء” او ګڼشمېر مسولینو او منسوبینو ګډون درلود.
مسولینو یادو فارغانو ته د وینا پر مهال وویل:«د مشرانو د اوامرو اطاعت وکړئ او د کلک عزم او قوي عقیدې پر مټ د هېواد له سرحداتو څخه ساتنه وکړئ. همداراز، تاسو مکلف یاست چې ترلاسه کړې مسلکي زدهکړې هېرې نه کړئ او هغه نورو مستحقو مجاهدینو ته هم ورزده کړئ.»
ورته مهال، نویو فارغانو مسولینو ته ډاډ ورکړ، چې د ترلاسه کړو مسلکي زدهکړو او ایماني جذبې پر مټ به د هېواد له خپلواکۍ، ځمکنۍ بشپړتیا او اسلامي ارزښتونو څخه په مېړانه ساتنه کوي.