د هند حکومت د افغانستان د روغتیايي سکتور د پیاوړتیا په موخه شپږ عرادې مجهز امبولانسونه د کورنیو چارو وزارت د روغتیايي چارو لوی ریاست اړوند د پولیسو ملي تخصصي روغتون ته وسپارل.
د مسوولینو په وینا، یاد امبولانسونه په عصري طبي وسایلو سمبال دي او د بېړنیو روغتیايي خدمتونو د چټکتیا او اغېزمنتیا په لوړولو کې به مهم رول ولوبوي، چې له دې لارې به د امنیتي ځواکونو او عامو هېوادوالو روغتیايي اړتیاوو ته پر وخت رسېدنه اسانه شي.
د کورنیو چارو وزارت د دې بشردوستانه همکارۍ له امله د هند له حکومت څخه مننه کړې او دا مرسته یې د دواړو هېوادونو ترمنځ د روغتیايي او بشري همکاریو د دوام نښه بللې ده.