فراه ولايت د مرکز اړوند په ګینهکان کلي کې د اوبو رسولو يوه شبکه د کلیو بیارغونې او پراختیا ریاست رییس مفتي محمد نسيم سرهنګ له لوري د ځایي اوسیدونکو، د شورا مسولینو، يو شمير سپين ږيرو او ځوانانو په شتون کې ګټې اخيستنې ته سپارل شوې.
د دغې شبکې د پرانيستې پر مهال د فراه ولايت د کليو بيارغونې او پراختيا رياست ریيس مفتي محمد نسيم سرهنګ ویلي؛ ياده شبکه د یونیسف په مالي ملاتړ د دې ولایت د کلیو بیارغونې او پراختیا ریاست تر رهبري لاندې د څلورو میاشتو په موده کې د ۵.۴ میلیونه افغانیو په مالي لګښت جوړه او ګټې اخيستنې ته وسپارله شوه.
نوموړي زیاته کړې، چې د کور په کور اوبو رسولو ياده شبکه په يو وخت کې د اوه کيلو مترو غځيدلو نلونو له لارې، د دې کلي ۵۰۰ کورنيو ته د څښاک پاکې اوبه برابرې او رسوي.
د مفتي محمد نسيم سرهنګ په وینا؛ د ياد رياست رهبري پلان لري، چې د دې ولايت په هر کلي کې د څښاک پاکو اوبو رسولو شبکې جوړې کړي، ترڅو د خلکو ستونزې هوارې شي.
ځایي اوسیدونکو د کليو بيارغونې او پراختيا له رياست څخه د مننې ترڅنګ ویلي؛ دا د دوی په کلي کې د اوبو رسولو درېيمه شبکه ده، چې په جوړیدو سره به یې د خلکو ستونزې تر یوې اندازې حل شي.