د اطلاعاتو او کلتور وزارت د ځوانانو چارو مرستیال قاري محمد یونس راشد هرات ته د خپل سفر په ترڅ کې د فریلانسینګ زده کړې پروګرام د ۷۰ تنو ځوانانو په فراغت غونډه کې ګډون کړی.
ښاغلي راشد ویلي؛ د اسلامي امارت ځوانان د ټولنې د ملا تیر ګڼي او ځوانان هم بايد له نظام سره همکاري وکړي.
نوموړي زیاته کړې، د ځوانانو د ستونزو اورېدو په موخه مو د هېواد ډېرو ولايتونو ته سفرونه کړي، چې په ټول هېواد کې اصلي ستونزه د ځوانانو وزګارتيا وه، له نیکه مرغه دغه ستونزه د اطلاعاتو او کلتور وزارت له خوا د فریلانسینګ پروګرام په پیلولو سره تر يوه حده حل شوې او اړتيا ده، چې دغه پروګرام پراخ شي.
قاري محمد یونس د هرات له ځوانانو غوښتي، چې د فریلانسینګ د زده کړې پروسه له نورو ځوانانو سره هم شریکه کړي.