د کابل ولایت د سیاحتي او درماني شرکتونو اتحادیې رییس احمد سیر رحیمي او د هېواد د بېلابېلو ولایتونو د سیاحتي او درماني شرکتونو استازو د اطلاعاتو او کلتور وزارت د ګرځندوی، مالي او اداري چارو له مرستیال مولوي قدرت الله جمال سره لیدنه کړې ده.
د اطلاعاتو او کلتور وزارت وایي، چې د یادې لیدنې موخه د سیاحتي او درماني شرکتونو د مسولینو د ستونزو او وړاندیزونو اورېدل، په هېواد کې د تفريحي ځایونو پراختیا او تنظیم، د جوازونو وېش او غځولو په برخه کې د اسانتیاوو برابرول او سيلانيانو ته د لا ښو خدمتونو وړاندې کول دي.
یاد وزارت زیاته کړې، چې په دې لیدنه کې د سیاحتي او درماني شرکتونو استازو د ګرځندوی، مالي او اداري چارو له مرستیال څخه د دوامدرې همغږۍ او ستونزو ته پر وخت رسېدنې له امله مننه کړې او ويلي یې دي، چې د سيلانيانو او ناروغانو د ویزو ترلاسه کولو په برخه کې د شته ستونزو د حل په موخه له اړوندو ادارو سره لا زیاته همغږي وشي.
همدا رنګه د ګرځندوی، مالي او اداري چارو مرستیال مولوی قدرتالله جمال ویلي: “د اطلاعاتو او کلتور وزارت د ټولو ګډ کور دی او د خوښۍ ځای دی، چې د ګرځندوی سکټور د پیاوړتیا او پراختیا په موخه ګډ کار کوو.”
دغهراز ښاغلي جمال، د هېواد د سیاحتي او درماني شرکتونو د استازو ستونزې او وړاندیزونه اورېدلي او ډاډ يې ورکړی چې، یادې ستونزې او وړاندیزونه به د اړوندو ادارو له مسولینو سره شریکې کړي؛ څو سيلانيانو ته اړینې اسانتیاوې برابرې او په دغه سکټور کې شته ستونزې حل شي.
نوموړي د ګرځندوی سکټور د لا ښه تنظیم او پراختیا په موخه د سیاحتي او درماني شرکتونو د استازو مشورې او نظرونه اړین بللي او يادونه یې کړې، چې د اطلاعاتو او کلتور وزارت د دغه سکټور پیاوړتیا ته ژمن دی.