په کابل کې د ترکیې د ډيپلوماتيک ماموريت نوي مشر سادین اي يلديز د افغانستان اسلامي امارت د بهرنیو چارو له وزیر مولوي امیرخان متقي سره تعارفي لیدنه کړې.
د بهرنیو چارو وزارت وایي، چې په دې لیدنه کې د دوه اړخيزو اړيکو پر پراختيا خبرې شوې دي.
دغهراز مولوي امیرخان متقي د ترکیې جمهوریت د افغانستان نږدې دوست بللی او د دواړو هېوادونو ترمنځ یې دوهاړخیزې اړیکې مخ پر وده ارزولي دي.
نوموړي همداراز د هېواد د بهرنیو چارو وزیر په توګه د ترکیې جمهوریت د ډیپلوماتیک ماموریت نوي مشر ته د بریا هیله څرګنده کړې ده.
ورته مهال سادین اي يلديز هم پر خپل وار د دواړو هېوادونو اړيکې مثبتې بللي او په اقتصادي او روغتيايي برخو کې يې د دواړو هېوادونو ترمنځ د همکاريو پر پراختيا ټينګار کړی دی.