د پاکستان د دفاع وزیر خواجه اصف د دغه هېواد د اسمبلۍ په غونډه کې ویلي، چې پاکستان له څو لسیزو راهیسې د لویدیځ د ګټو لپاره د کرايي ځواک په توګه افغانستان کې فعالیت کړی او دغه تېروتنې لا هم تکراروي.
نوموړي زیاته کړې:« موږ لا هم پر تېرو تېروتنو باندې اعتراف نه دی کړی، تر هغې چې موږ پر خپلو تاریخي تېروتنو اعتراف ونه کړو، نه شو کولای ځان اصلاح کړو، شاوخوا ۲۳ کاله په افغانستان کې دخیل و اوس پوښتنه دا ده چې ولې زموږ په هېواد کې ترهګري زیاته شوې زه فکر کوم چې دا د همغو سیاستونو پایله ده.»
خواجه اصف په داسې حال کې له دې حقایقو پرده پورته کوي، چې اسلامي امارت تل پاکستان د افغانستان په داخلي چارو کې په لاسوهنې تورن کړی.