بهرنیو چارو وزارت یو ځل بیا له پاکستان څخه د بندي افغانانو د خوشي کولو غوښتنه کړې ده.
یاد وزارت د یوې خبرپاڼې په خپرولو سره ویلي، چې اسلام اباد کې د افغانستان سفارت او جنرل قونسلګریو سره د پاکستاني ادارو او چارواکو له ژمنو وروسته هم په پاکستان او په ځانګړي ډول سند ایالت کې د ښځو او ماشومانو په ګډون نیول شوي افغانان نه دي ازاد شوي.
په خبرپاڼه کې زیاته شوې؛ د افغانستان سفارت بیا هم پر پاکستاني چارواکو غږ کوي، چې په پاکستان کې د مېشتو کډوالو او مسافرو افغانانو، په ځانګړې توګه د ښځو، ماشومانو، سپین ږیرو او ناروغانو زنداني کول او ځورونه، خورا دردوونکې ده او د دواړو وروڼو هېوادونو د اړیکو لپاره ښه پایله نه لري.
یاد وزارت د افغان بنديانو د ژر تر ژره خوشې کولو او د دې لړۍ د پای ته رسولو غوښتنه کړې ده.