ملي پراختیا شرکت وايي، چې د قوشتیپې د ستر او تاریخي کانال هېڅ دېوال نه دی تخریب شوی او په دې اړه ادعاوې او اوازې بېاساسه دي.
د یاد شرکت په وینا؛ د دې ستر او ملي کانال چارې په خورا مسلکي ډول پر مخ وړل کېږي.
دغهراز د قوش تېپې ملي کانال پروژې مسولین وايي، چې دولت اباد ولسوالي کې د دې کانال د دویم فاز چارې په چټکۍ سره پر مخ روانې دي او په ۹۰ کیلومترۍ کې یې د يوه لوی پله د رغولو لومړنۍ چارې هم دوام لري، چې په نیږدې ورځو کې به یې د سروې پروسه پای ته ورسېږي او د جوړېدو عملي چارې به يې پيل شي.
یادو مسولینو د یو شمېر مغرضو کړیو هغه ادعاوې رد کړې، چې ګواکې د یاد کانال یو دېوال تخریب شوی او اوبه د دښتې په لور تللې دي.
دوی وايي؛ کانال کې د اوبو حجم ورځ تر بلې پر زياتېدو و، چې د ملي پراختيا شرکت مسولينو یې د مهار او پله جوړېدو په موخه په منظم ډول د دښتې خواته خوشې کړې دي.
ملي پراختیا شرکت دا ډول اوازې او ادعاوې ردوي او دا کړنه د هغو کړیو کار ګني، چې زموږ د هېواد وروستي پرمختګونه نه شي زغملای.
یاد شرکت ټولو هېوادوالو ته ډاډ ورکوي، چې د دې سترې او ملي پروژې چارې په خورا مسلکي او هېوادنۍ مینه پرمخ وړل کېږي.
یو شمېر هغه بزګران چې د یاد ستر کانال په شاوخوا کې ځمکې لري د قوشتیپې کانال د جوړېدو په برخه کې د اسلامي امارت د مشرتابه هڅې ستایي او وايي، چې د دې کانال له اوبو څخه په اسانۍ خپلې ځمکې خړوبوي.