د ریاست الوزرا عالي لوی رییس ډاکتر ملا عبدالواسع د افغانستان د سوداګرۍ او پانګونې خونې سرپرست حاجي محمدیونس مومند، د پاک- افغان ګډې سوداګرۍ او پانګونې خونې رییس محترم خانجان الکوزی، د صنایع خونې رییس شیربازکمین زاده او د صنایع سبز پروژې له مسولینو سره لیدنه کړې.
خانجان الکوزی، حاجي محمد یونس مومند او محسن امیري سوداګرو ته په برابرو شویو اسانتیاوو او خوندي امنیت خوښي څرګنده او د سوداګرۍ په وړاندې د شته خنډونو د له منځه وړلو په اړه خپلې ستونزې او وړاندیزونه شریک کړي.
نوموړو د اسلامي امارت له لوري په هېواد کې د سراسري امنیت د تامین ترڅنګ موجوده اقتصادي پرمختګونه او د لویو پروژو پلي کول ستایلي او د بهرنیو اسعارو پر وړاندې د افغانۍ د ارزښت په لوړېدو یې خوښي ښودلې.
همدارنګ یې په ده سبز کې د صنایع سبز صنعتي پارک د کارونو د چټکولو او د ستونزو حل په اړه خپل وړاندیزونه وړاندې کړي، ترڅو له پاکستان څخه راستنېدونکو پانګوالو ته د پانګونې زمینه برابره شي.
ډاکتر ملا عبدالواسع د افغانستان په اقتصادي وده او د لویو پروژو پلي کېدو کې د خصوصي سکتور ونډه او رول ستایلي او ویلي يي دي؛ د اسلامي امارت مسولین پرله پسې هڅې کوي چې خلکو او سوداګرو ته اسانتیاوې برابرې شي، ترڅو اقتصادي ځان بساینې ته ورسېږو او د هېواد اقتصاد د بیروني تکیې پرځاې پر خپلو پښو ودرېږي.
نوموړي د خصوصي سکتور مسولینو ته ډاډ ورکړی، چې په وړاندیزونو او مشورو یې غور او د حل لپاره جدي هڅې کوي.