د لوړو زده کړو وزارت علمي مرستیال د امارتي او خصوصي تحصیلي بنسټونو له مشرتابه پلاوي سره د علمي کادر د جذب نوې لایحې د عملي کولو په موخه په انلاین ناسته کې خبرې کړي.
د لوړو زده کړو وزارت علمي مرستیال دوکتور لطف الله خیرخواه په یاده ناسته کې د هېواد ځوان نسل د روزنې له امله د امارتي او خصوصي تحصیلي بنسټونو فعالیتونه ستایلي او ویلي يي دي؛ د علمي کادر د جذب په برخه کې د عدالت د تأمین او روڼتیا رامنځ ته کولو په پار، نوې لایحه جوړې شوې او همدارنګه د یادې لایحې پر اساس خصوصي پوهنتونونه کولی شي چې دایمي استادان وګوماري.
نوموړي زیاته کړې؛ چې دا د لوړو زده کړو وزارت په تاريخ کې لومړی ځل دی، چې د خصوصي تحصيلي بنسټونو استادان په رسمي او دايمي توګه داسې ګمارل کيږي، چي د لوړو زده کړو وزارت لخوا به يادو کادرونو ته علمي رتبې هم ورکوي.
د لوړو زده کړو وزارت د تقرر او ترفیعاتو رییس مفتاح الدین عزام د یادې لایحې په اړه معلومات ورکړي او ویلي يي دي؛ د ټولو خصوصي تحصیلي بنسټونو د استادانو تقرر او ترفیع، په زوني امارتي تحصیلي بنسټونو کې کېږي.
نوموړي د علمي کادر د جذب لپاره د نمرو سلنې، عمر، د استاد په حیث په امارتي تحصیلي بنسټونو کې د معتبرو خصوصي پوهنتونونو د فارغینو د جذب پر څرنګوالي او د یادې لایحې په اړه د تحصیلي بنسټونو د مسولینو پوښتنو ته ځوابونه ویلي.
یاده لایحه د لوړو زده کړو وزارت په وب سایټ کې نشر شوې ده او د لاسرسي وړ ده.