په افغانستان کې د ملګرو ملتونو د بشري او پرمختيايي چارو نوي مسول او د يوناما مرستيال اندريکا رتواتي د بهرنيو چارو له سرپرست وزير مولوي امير خان متقي سره لیدنه کړې.
د بهرنيو چارو سرپرست وزير ښاغلي اندريکا ته د هغه د نوې دندې مبارکي ویلې او د يوناما له تلونکي مرستيال ډانيل انډريس څخه يې د هغه د ښه مديريت او هلو ځلو له کبله مننه کړې او هغه ته يې په راتلونکې دندې کې د برياليتوب غوښتنه کړې.
مولوي امير خان متقي ویلي؛ د افغانستان اسلامي امارت په افغانستان کې د بشري او پرمختيايي کارونو له پاره برابر چاپيريال رامنځته کړی، چې له برکته يې په تېرو څه باندې دوو کلونو کې په دغې برخې کې کارونه په ښه ډول پر مخ تللي.
اندريکا د ملګرو ملتونو د کډوالو د عالي کمېشنرۍ په چوکاټ کې د اسيا پاسيفيک سيمې د ریيس په توګه خپلې مخکېنۍ دندې ته په اشارې سره ویلي؛ له دې وړاندې يې هم د افغانانو د ستونزو، په ځانګړې توګه په ګاونډيو هېوادونو کې مېشتو او راستنېدونکو افغانانو د ستونزو، د کمولو له پاره هلې ځلې کړي، او هوډ لري چې په نوې دندې کې به په بشري او پرمختيايي ډګر کې د افغانانو د لاسنيوي له پاره لا ډېر کار وکړي.
په پای کې د بهرنيو چارو وزير ښاغلي اندريکا ته د اسلامي امارت له خوا د هر ډول همکارۍ ډاډ ورکړی.