د افغانستان اسلامي امارت د رياست الوزرا اداري مرستيال مولوي عبدالسلام حنفي له محمد هاشم الکوزي سره لیدنه کړې.
محمد هاشم الکوزي ویلي؛ تر کلونو ناامنيو وروسته د الله تعالی په لوروینه او د اسلامي امارت د مجاهدينو په هڅو بيا ځلې د اسلامي امارت ټېنګښت په ټول هېواد کې د سراسري امنيت او ثبات رامنځته کېدو لامل شوی او اداري فساد لمنځه تللی، چې دغه کار په هېواد کې د ګډوډيو له منځه تللو ته زمينه برابره کړې ده.
نوموړي روغتیا، ښوونې او روزنې او نښلوونکو لارو ته د مسولينو د پاملرنې غوښتنه کړې او د اسلامي امارت مسولينو څخه يې غوښتي، چې دغو برخو ته ځانګړې پاملرنه وکړي.
د رياست الوزرا اداري مرستيال ویلي؛ د امنيت ټینګښت، د فساد لمنځه تلل او په مختلفو برخو په ځانګړي ډول د خلکو اساسي حقوق او خلکو ته د خدمتونو وړاندې کول د حکومت په توګه د اسلامي امارت ژمنتيا ده.
نوموړي زياته کړې، مسولين به ذکر شوي موضوعاتو ته د رسېدنې لپاره له هېڅ ډول هڅو درېغ ونه کړي او د يو بل په همکارۍ او ملاتړ کولای شو، چې ګران هېواد اباد کړو.