د کندز ولایت د بدني روزنې او سپورټ رياست اړوند د وزلوبې فدراسيون د استازولۍ او د یو ځايي سوداګر په مالي ملاتړ په دورې بزکشۍ ورزشي لوبغالي کې له ۱۴ ولايتونو څخه د ۳۵۰ چاپندازانو ترمنځ د سالمې تفريح او د ملي او دوديزو لوبو دودولو په موخه د وزلوبې سيالۍ پای ته ورسېدې.
د يادو سياليو په ورستۍ ورځ د میدان حکم له لوري درې اخرالاقه اعلان شول، چې لومړی له تخار څخه صبغت الله پهلوان، دويم له کندوز څخه ذبيح الله پهلوان او درېيم هم له کندوز څخه مولا گل کندوزي پهلوان تر ټاکلې دايرې ورساوه.
په دغو سیالیو کې د کندوز، بغلان، تخار، بدخشان، سمنگان، بلخ، جوزجان، فارياب، سرپل، سمنگان، پنجشېر، پروان، کابل، کاپيسا او باميان ولايتونو چاپندازانو ګډون کړی وو، چې درې ورځې يې دوام وکړ.
په یادو سیالیو کې صبغت الله پهلوان ته د یو سوداګر له خوا يو موټر، ذبيح الله پهلوان ته د اتاق تجارت آمريت له خوا ۱۰۰۰ ډالر او يو موټر او مولا گل کندزي پهلوان ته هم د یو سوداګر له خوا ۴۰۰۰ زره ډالر او د کندوز ولايت مخور له خوا ورته يو موټر او يو کپ د انعام په توگه ورکړل شول.