د مسکو په کراسنوګورسک ښار د موسیقۍ پر یو تالار د جمعې ورځې په ماښام د وسلوالو په برید کې ۶۰ کسان وژل شوي او له ۱۰۰ ډېر ټپیان شوي دي.
برید کې له بمي چاودنو او سپکو او درنو وسلو څخه کار اخیستل شوی، چې مسولیت یې داعش ډلې منلی.
برید هغه مهال شوی، چې خلک په یاد تالار کې د موسیقۍ اورېدو ته په یو کنسرت کې راټول شوي وو.
ورته وخت کې د امریکا استخباراتي چارواکو ویلي، چې موده وړاندې یې د همدې مارچ میاشتې په اوږدو کې د دغه برید په اړه روسانو ته معلومات ورکړي وه.
برید د ملګرو ملتونو، ځینو هېوادونو او سازمانونو ترڅنګ افغانستان هم غندلی دی.
بهرنیو چارو وزارت د یوې اعلاميې په خپرولو سره د روسیې په مسکو ښار کې وروستی برید غندلی او هغه یې د انساني ارزښتونو ښکاره نقض بللی دی.
یاد وزارت ویلي، چې ځیني اطلاعاتي سازمانونه هڅه کوي تر څو په دا ډول بریدونو سره د اسلام مبارک دین بد نام کړي او سیمه وګواښي.