د کورنیو چارو وزارت ویلي؛ د دې وزارت د نشه يي توکو سره د مبارزې مرستیال لوی پاسوال ملا عبدالحق همکار په افغانستان کې د روغتیا نړیوال سازمان (W.H.O) له مسولینو، افغانستان کې د نشه یي توکو د تقاضا کمولو، رواني روغتیا او غیر ساري ناروغیو څانګې مشر ډاکتر منول دلارا او د یاد سازمان د نشه یي توکو د تقاضا کمولو او رواني روغتیا څانګې له مشر ډاکتر علي رضا نوروزي سره لیدنه کړې.
یاد وزارت زیاته کړې؛ په دې لیدنه کې ملا عبدالحق همکار یادو استازو ته په ټولو ولایتونو او پلازمېنه کابل کې د بې کوره روږدو د راټولولو، درملنې او ملاتړ په هکله معلومات ورکړي او په یاده برخه کې یې د نشه یي توکو سره د مبارزې معینیت لاسته راوړنې له دوی سره شریکې کړې دي.
د روغتیا نړیوال سازمان استازو د معینیت د فعالیتونو د ستاینې ترڅنګ په یادو برخو کې د همکاریو د پراختیا ژمنه کړې ده.