یوه برېتانوي چارواکی چې تازه له افغانستان څخه ستون شوی وايي، چې برېتانیا باید افغانستان کې خپل سفارت پرانیزي او له اسلامي امارت سره خبرې او تعامل پیل کړي.
د برېتانیا د محافظهکار ګوند سیاستوال او د ختیځو هېوادونو لپاره د دې هېواد د پارلمان غړی توبیاس الوود وايي، چې افغانستان ته د سفر په ترڅ کې د واقعي پرمختګونو شاهد و او په باور یې، اوس د دې وخت را رسېدلی، چې برېتانیا له اسلامي امارت سره تعامل او خبرې پیل کړي.
نوموړي له تلګراف ورځپاڼې سره په خبرو کې ویلي، چې افغانستان کې د تېرو وختونو په پرتله امنیت په ښه ډول تامین شوی او ډېری ښځو ته د کار اجازه ورکړل شوې ده.
د ښاغلي الوود په وینا؛ له افغانستان سره د تعامل په لومړي ګام کې باید کابل کې خپل سفارت پرانیزو.
دې برېتانیوي سیاستوال ټینګار کړی؛ اوس د دې وخت را رسېدلی، چې برېتانیا له افغان حکومت سره په ګډه کار وکړي، تر څو د بې ثباتي او ډلییزې کډوالۍ مخه ونیول شي.
د اسلامي امارت نږدې دوه کلن حاکمیت کې افغانستان د بې شمېره پرمختګونه شاهد و، چې د نړیوالو پام یې ځان ته را اړولی دی.
افغانستان کې بشپړ امنیت تامین شوی، فساد په بشپړ ډول له منځه تللی، د نشهیي توکو کارو بار او کرکیله منع کړل شوې، لویې او وړې پرمختیايي پروژې پیل شوې، اقتصادي پرمختګ شوی، د کانونو استخراج پیل شوی او په کم وخت کې په بېلا بېلو برخو کې بې ساري پرمختګونه را منځته شوي دي.