د افغانستان اسلامي امارت د کابینې شپږمه غونډه د رییس الوزرا الحاج ملا محمدحسن اخند په مشرۍ پرون دوشنبه (۱۴۴۶ ھ ق کال د ربیع الاول ۱۳مه/ وږي ۲۶مه) نېټه ترسره شوه او د يو شمېر موضوعاتو په اړه بحث او پرېکړې پکې وشوې.
د کابينې دا غونډه چې د قرانکريم په تلاوت پيل شوه، له اجنډا سره سم د سرحدونو، قومونو او قبايلو چارو وزارت ته سپارښتنه وشوه، چې د هېواد په لرې پرتو سيمو کې پیل شويو پراختيايي، تعلیمي او روغتيايي چارو ته جدي پاملرنه وکړي او ټولو محرومو سيمو کې مېشتو هېوادوالو ته د شته امکاناتو نه په استفاده په عاجله توګه د ژوند اسانتياوې برابرې کړي.
همدا راز په دې غونډه کې د ځمکې لاندې اوبو کارولو د مدیریت طرحې په اړه هم بحث وشو او پرېکړه وشوه، چې له اصولي پړاوونو ترسره کولو وروسته دې د تائید او منظورۍ لپاره د عالیقدر امیرالمؤمنین حفظه الله تعالی مقام ته وړاندې شي.
د کابينې دا غونډه د خير په دعا پای ته ورسېده.