عامې روغتیا وزارت د یوې خبرپاڼې په خپرولو سره ویلي، چې د ځینې بهرنیو رسنیو له لوري هېواد کې د ګوزڼ ضد واکسین د بندښت په تړاو راپورونه حقیقت نه لري او به دې برخه کې هېڅ خنډ نه دی رامنځته شوی.
کابل کې د ماشوم روغتیا/صحت طفل روغتون کې د ګوزڼ ضد واکسین د تطبیق څانګې ډاکټران وايي، چې چارې یې په عادي ډول روانې دي او د ګوزڼ واکسین د کمپاین پر مهال او هم په ورځني ډول له پینځو کلونو کمعمره ماشومان واکسینوي.
عامې روغتیا وزارت د روغتیا نړیوال سازمان له قوله د ځینې بهرنیو رسنیو هغه راپورونه ردوي، چې ګواکې اسلامي امارت په افغانستان کې د ګوزڼ ضد واکسین منع کړی.
یاد وزارت وايي، چې د ټولو ممکنه لارو څخه په ګټې اخېستنې هڅه کوي، چې د ساري او ګوزڼ ناروغیو د خپریدو مخه ونیسي.
د عامې روغتیا وزارت د مسولینو په وینا؛ د روان کال له پیله یې تر اوسه په هېواد کې شپږ دورې د ګوزڼ ضد واکسین تطبیق کړی او د اړتیا پر مهال به د دې ناروغۍ د مخنیوي په موخه نورې دورې هم پیل کړي.