کابل کې د روسیې فدراسیون سفیر دیمیتري ژیرنوف د بهرنیو چارو له وزیر مولوي امیر خان متقي سره لیدنه کړې.
په دې لیدنه کې د روسیې سفیر د بهرنیو چارو وزیر ته د افغانستان په اړه د مسکو مشورتي فارمټ راتلونکې ناسته کې د ګډون بلنه ورکړې.
دیمیتري ویلي، د افغانستان اسلامي امارت سره اړیکې يې هېواد ته ارزښت لري او د هغه هېواد په کوربهتوب په ټولو سیمهییزو او نړیوالو ناستو کې د افغانستان پلاوي ته د ګډون بلنه ورکول کېږي.
د بهرنیو چارو وزیر د مسکو فارمټ راتلونکې ناسته کې د ګډون له بلنې مننه کړې او ویلي یې دي، د افغانستان اسلامي امارت له پیله د روسیې په نوښت د مسکو فارمټ ناستو کې ګډون کړی او په مثبت نظر ورته ګوري.
مولوي امیر خان متقي د مسکو فارمټ راتلونکې ناسته بل فرصت بللی، چې په ترڅ کې به يې د روسیې له لوړپوړو مسولینو او د سیمې هېوادونو استازو سره پر دوو اړخیزو مسایلو خبرې اترې وشي.