د ارشاد حج او اوقافو وزارت د عرفان او دیني ځایونو د چارو تنظیم مرستیال شیخ عزیزالرحمن منصور او ورسره مل پلاوی د ایران د اسلامي هېواد په رسمي بلنه او د افغانستان د اسلامي امارت په استازیتوب د دې هېواد په پلازمینه تهران کې د اسلامي وحدت په ۳۸م نړیوال کنفرانس کې د ګډون په موخه یاد هېواد ته سفر کړی.
یاد کنفرانس د (ګډو ارزښتونو د لاسته راوړنو لپاره د اسلامي همکاري) تر عنوان لاندې د ۱۴۴۶هجري قمري کال د ربیع الأول له ۱۵مې نېټې څخه پیل کېږي او د دې میاشتې تر ۱۷مې نېټې پورې به دوام ولري.
په یاد نړیوال کنفرانس کې د اسلامي نړۍ د بېلا بېلو ستونزو او مسایلو په اړه خبرې کیږي، چې د نړۍ له مختلفو هېوادونو څخه پکې علمای کرام، مفکرین، څېړونکي او مشهور شخصیتونه ګډون کوي .